Það hlaut að koma að þessu, kallinn einn heima með krakkana. Reyndar ekki alla krakkana því að Bjarki Flóvent fór á Shell mótið útí Eyjum á miðvikudaginn. Það voru heldur betur flott heitin á honum, fékk bara einkaflugvél ásamt Kolla vini sínum og pabba hans. Eins og það hafi ekki verið nóg heldur þá fengu þeir líka aðeins að stýra flugvélinni á leiðinni og þeim fannst það alveg GEÐVEIKT :)

Bjarki Flóvent stendur sig víst eins og hetja þarna úti í Eyjum og er strax búinn að skora nokkur mörk :)

En eins og áður sagði þá er ég bara einn heima með hin tvö börnin, Björgvin Júlíus og Ingu Maríu. Helga fór nefnilega með flokkinn sinn, sem hún er að þjálfa, á mót á Sauðarkróki í gær. Hvernig haldiði að hún hafi farið þangað, jájá alltaf sami lúxusinn á þessu liði, auðvitað flug hún þangað. Ekkert kreppu rugl á þessum bæ, bara 2007 all the way!!!

Það er alveg ótrúlegt að ég og Helga skulum vara búin að búa saman í næstum 2 og hálft ár og þetta sé í fyrsta skipti sem að ég sé einn heima með krakkana, þar að segja yfir nótt. Á sama tíma hef ég farið í heimsókn til Dagnýjar 2svar sinnum, farið í yfir 3 mánuði til Spánar og gist nokkrum sinnum uppá Sogavegi. En nú er fysta nóttin að baki og ég get ekki sagt annað en hún hafi bara gengið alveg ljómandi vel. Björgvin Júlíus færði afruglarann inní hjónaherbergi svo að við gætum leigt okkur mynd í VOD-inu og varð Ocean´s Eleven fyrir valinu. Við lágum svo öll þrjú saman í hjónarúminu og horfðum á sjónvarpið með smá snakk og nammi. Þegar myndin var svo búin þá fór ég fram með Ingu Maríu að bursta tennurnar og svo var bara farið að sofa. Allir sáttir og glaðir. Nú sitjum við svo öll hérna uppí rúmi að horfa á Sveppa (reyndar er verið að sýna Dóru í þessum skrifuðu orðum). Veit ekki alveg hvað planið er að gera núna á eftir en Óli Stefán er víst að fara að keppa í mosó með Sindra á eftir og var það víst einhver pæling að kíkja kannski á það og svo var Patti víst búinn að óska eftir því að fá að koma í heimsókn þannig að það verður nóg að gera.

En núna þarf ég að fara að gera auglýsingu inná barnalandi eftir tengdamömmuboxi þar sem að mig sárlega vantar slíkt fyrir næstu viku.

Þangað til þá


Þetta er Daníel T. Daníelsson sem skrifar frá Álftanesi

Það er víst það sem að allir eru að tala um í tengslum við Heimsmeistarakeppnina í fótbolta þetta árið. Þessir lúðrar sem að fólk er með á leikjum eru að gera alla brjálaða, lýsendur í sjónvarpi tala varla um annað en þegar að þeir gera það þá er það yfirleitt til að lýsa því yfir hvað þessi bolti virðist vera að virka illa. Flest lið virðast eiga í miklum erfiðleikum með að senda hann á milli sín og svo virðist sem að hann sé oftar útaf vellinum en inná.

Langaði líka að óska Grinvíkingum til hamingju með fyrsta sigurinn sinn í deildinni hérna heima þetta árið. Til hamingju Grindavík. Svo langar mig líka að óska Frömmurum til hamingju með 1. sætið, vonandi að þeir nái að hanga á því bara út tímabilið. Mun skemmtilegra ef að Fram vinnur þetta frekar heldur en FH eða KR.

Eins og einhver hefur eflaust tekið eftir þá er ég aðeins byrjaður að blogga aftur. Ákvað að gera það eftir að ég fékk eitt komment hérna um það hvað það gæti verið gaman að lesa þetta blogg eftir nokkur ár, ef ekki áratugi. Sjá hvað maður var að gera á þessum deginum og hinum. Held líka að þetta blogg mitt og ég þá í leiðinni sé bara búinn að vera í ákveðinni tilvistarkreppu. Fylgir því eflaust þegar að maður veit ekkert hvað tekur við hjá manni. Ég veit í raun ekkert hvað ég verð að gera í sumar, batt miklar vonir við að fá vinnu í gegnum þetta átaksverkefni sem að Ríkisstjórnin og Vinnumálastofnun fóru í gang en svo virðist sem að það sé ekkert að fara að gerast. Ég sótti um ríflega 20 störf og fékk ekki meira en 1 viðtal sem segir mér það að ég hlýt að vera að gera eitthvað mikið rangt einhver staðar. En sökum þess að þetta gekk ekki upp þá veit ég ekkert hvað ég verð að gera í sumar. Slík óvissa hefur alltaf lagt frekar illa í mig, mér líður yfirleitt betur þegar að ég veit nokkurn vegin hvar ég verð næstu vikurnar eða mánuðina. Held þess vegna að mér hafi liðið ágætlega að vera bara í skóla, þá veit ég alveg hvað tekur við hjá mér næsta haust og svo næst vor o.s.frv. En þessi óvissa sem er í gangi núna leggst ekki vel á sálina hjá mér. Liður svona nokkur vegin eins og maður sé bara eitthvað misheppnaður, sem er sjálfsagt eðlilegt þegar maður hefur ekkert fyrir stafni. Er að vísu búinn að vera að hjálpa pabba svolítið uppá síðkastið. Málaði bílskúrinn og hjálpaði honum við að rífa niður bátaskýlið uppí bústað, er svo að fara að aðstoða hann við að smíða nýtt grinverk á Sogaveginum núna í vikunni.

Ætli maður endi ekki bara með að lúffa þessari viðskiptafræði og fara að læra eitthvað gagnlegt eins og t.d. smiðinn eða píparann? Hver veit? ;)



Þetta er Daníel T. Daníelsson sem skrifar frá Álftanesi

Febrúar: Ólíkt janúar þá var febrúar ekki beinlínis viðburðaríkur. Hann byrjaði að vísu á góðum nótum þar sem að ég var í heimsókn hjá Dagnýju úti í Köben þegar styðsti mánuður ársins gekk í garð. Það var fátt annað merkilegt sem að gerðist í þeim mánuði. Við familían kíktum að vísu uppí bústað í smá helgarferð sem að var mjög skemmtileg. Ég og Helga héldum líka uppá 2 ára sambandafmælið okkar þar sem að ég var víst úti í Danmörku á sjálfu afmælinu (sem er bara for the record 31. Janúar) og gaf Helga mér alveg fáránlega flott Armani úr í gjöf á afmælinu, ég er eiginlega bara ennþá orðlaus fyrir þessu en svona er hún bara yndisleg hún Helga mín. Látum það vera lokaorðin fyrir þennan mánuð. Helga kærastan mín er yndisleg :)

Mars: Skemmtilegt að segja frá því að þegar ég er að skrifa þennan annál þá notasta ég alltaf við gamlar myndir frá því tímabili sem ég er að skrifa um sem og blogg úr þeim mánuði sem um ræðir svona sem heimildir yfir það sem við erum búin að gera. Ég var að skoða myndir frá því í Mars í fyrra og sá þá að ég og Helga fórum með Ingu Maríu að gefa öndunum í Mars á síðasta ári, þegar ég svo skoða annáls bloggið mitt fyrir árið 2008 þá les ég þar að við höfðum gert nákvæmlega það sama í mars árið áður. Sem sagt farið með strákana og Ingu Maríu sem var þá að vísu bara í bumbunni á Helgu, niður að tjörn að gefa öndunum. Ótrúlegt hvað við virðumst vera vanaföst og hreinlega bara gera sömu rútínuna aftur og aftur ár eftir ár. Eiginlega hálf spúkí ;) Fátt markvert gerðist í þessum mánuði, við kíktum með strákana á kaffihús í Smáralindinni og ég og Bjarki Flóvent fórum með Björgvin Júlíus að keppa á Selfossi í brjáluðu veðri og skítakulda. Inga María hélt áfram að stækka og verða að algjörum skæruliða, var þegar hér er komið við sögu farin að opna skúffur og tæta allt og drasl til eins og enginn væri morgundagurinn.

Apríl: Það er nú alltaf eitthvað merkilegt að gerast í apríl því að það er einmitt mánuðurinn sem hann Bjarki Flóvent á afmæli. Það var því slegið upp heljarinnar veislu með helling af kökum og kræsingum honum til heiðurs. Veðrið varð meira að segja líka það gott í apríl að ég grillaði úti á svölum ber að ofan. Dagný kíkti í heimsókn á frónið og við héldum páskana hátíðlega uppí bústað þar sem að krakkarnir og Dagný kepptust við að leita að páskaeggjunum sem falin voru víðsvegar um bústaðinn, svo var farið í pottinn og bara notið lífsins. Ég og Helga kíktum líka aðeins í leikhús í apríl, fórum með Ingu Mæju og Nonna að sjá einleikinn hans Péturs Jóhanns (sem ég tel mig nú reyndar eiga smá þátt í þar sem að maður var nú módel í auglýsingum fyrir sýninguna, og fékk að launum 4 miða á sýninguna) og kíktum svo út að borða á Geysir Bistro á eftir. Eins og þetta hafi ekki verið nóg fyrir þennan mánuð, þá fórum ég, pabbi og Björgvin Júlíus í smá veiðiferð uppað Hafravatni sem væri svo sem ekki frásögurfærandi nema fyrir þær sakir að ég var sá eini sem að veiddi eitthvað ;) Við fórum svo líka í enneina Tjarnarferðina,greinilegt að við erum búin að vera ansi dugleg að fóðra þessar blessuðu endur þarna í Tjörninni. Það voru víst líka tveir aðrir atburðir sem gerðust í apríl sem voru svo stórir að það voru þeir einu sem ég fann mig knúinn til að blogga um og það var þegar að Helga og reyndar strákarnir, fengu alveg fleiri tugi ef ekki hundruðir flóabita útum allan líkamann. Hef sjaldan séð annað eins en miðað við útganginn á henni Helgu minni þá er hún greinilega mjög gómsætur biti í augum (og reyndar munnum) flóa. Hitt sem að gerðist og fékk mig til að blogga var sú staðreynd að Fréttablaðið hætti að koma út hérna á Álftanesi, að vísu bara í tímabundinn tíma en núna í staðinn fyrir að það sé borið í öll hús eins og gert er á restinni af höfuðborgarsvæðinu þá er það bara sett í kassa sem eru á víð og dreif um Álftanesið og verður bara hver og einn að fara út og ná sér í blaðið ef hann svo kýs. Þetta gerði mig alveg öskuillan á sínum tíma en ég hef tekið Fréttablaðið í sátt síðan þá. Erfitt að vera reiður útí einhver sem er að gefa þér eitthvað frítt. Svo mörg voru þau orð

Maí: Það merkilegasta sem gerðist í Maí var vissulega 1.árs afmælið hennar Ingu Maríu. Vinum og vandamönnum var boðið í afmælið og var það hin mesta skemmtun. Sumir þurftu að vísu að vera aðeins lengur en aðrir þar sem að tímasetningin á boðinu fór víst eitthvað fyrir ofan garð og neðan þegar að ég bauð Kidda, hvort sem hann heyrði rangt eða ég sagði rangt, þá mætti hann allavegana góðum klukkutíma fyrir tilsettan upphafstíma afmælisins og neyddist hann því til að sitja hérna og sötra kaffi og hjálpa til við baksturinn uns afmælið byrjaði í raun og veru. Við kíktum líka út að borða á Ask (man reyndar ekki alveg af hvaða tilefni, það var eitthvað merkilegt. Hvort það var síðasta prófið hjá Maríu tengdó, ég að fá staðfestinu á skiptináminu eða hvað man ég bara ekki) og var það ansi gaman. Ég kíkti líka í heimsókn til Stebba og Sonju með Ingu Maríu(það verður að taka þetta fram þar sem að þetta er held ég eina skiptið sem ég hef farið með Ingu Maríu í heimsókn til þeirra) og fannst þeim Ingu Maríu og Birgi Leó bara voðalega gaman að leika saman. Það virðist sem að það hafi verið eitthvað þema að fara út að borða með mömmum sínum í Maí því að ég kíkti líka út að borða með mömmu minni ásamt nöfnu hennar henni Ingu María og skelltum við okkur á Safran sem að mamma var að fara á í fyrsta skipti og verð strax mjög heilluð af (skemmtilegt að segja frá því að það eru bara nokkrir dagar síðan að ég og Helga buðum mömmu einmitt aftur uppá Safran þar sem að við fórum og náðum í tvo gómsæta kjúklingarétti og humarsalat og komum með heim á Sogaveginn svona til að þakka henni fyrir alla pössunina og nuddið og allt það). Við kíktum svo líka uppí bústað þar sem að strákarnir afrekuðu það að dýfa sér ofan í Hafravatn, tóku að vísu ekki sundtök eins og ég gerði hérna um árið (enda kannski ekki alveg jafnvel einangraðir eins og ég var). Dagný var einmitt í heimsókn þarna og buðum við henni með okkur uppí bústað og áttum við alveg svakalega notalega helgi þarna uppí bústað saman. Grilluðum, fórum í pottinn, fórum út á hjólabátnum, slöppuðum af og höfðum það bara notalegt. Við fórum svo undir lok mánaðarins að horfa á Björgvin Júlíus keppa í gamla heimabænum hennar Helgu, Grindavík og ég fór svo með strákan líka að á bílasýninguna Burnout í Kórnum í Kópavogi, annað árið í röð. Mánuðurinn endaði svo á því að við fengum okkur göngutúr alla leið frá Álftanesinu og yfir í Garðabæinn til tengdó, reyndar voru bara 2 aðilar sem gengu, einn hjólaði og annar lág bara og hafði það notalegt í vagninum sínum. Má líka minnasta á það að alveg undir lok mánaðarins þá skoraði Helga á mig að blogga á hverjum degi og kom því alveg heil flóðbylgja af bloggum frá mér í júní. Gaman að því ;)

Júní: Þar sem að ég bloggaði víst á hverjum degi þennan mánuðinn eins og ég sagði ykku frá hér að ofan þá ætla ég bara að taka hvern dag fyrir sig og segja ykkur NÁKVÆMLEGA hvað ég gerði í þessum mánuði. Byrjaði á að fara með guttana í sund, fékk svo að vita að Kiddi vildi fá mig til að spúla stúkuna niðrá Laugardalsvelli. Inga María varð veik (ekki í fyrsta skipti) og hélt vöku fyrir okkur hjónum alla nóttina með ærandi gráti. Ég komst að því að hafði fallið aftur í Market Research en til að lina áfallið þá bauð Helga mér í bíó á Terminator Salvation í Lúxussalnum í Smárabíó (enn ein skemmtileg tilviljunin þvi að ég bauð Helgu í bíó í Lúxussalinn í Smárabíó í gær, greinilegt að við erum vanafastar skepnur). Ég gekk frá umsókninni minni um skiptinám til Madrid. Pabbi keypti nýjan utanborðs mótor á bátinn og bauð mér uppí bústað að testa gripinn. Það endaði sem algjört flopp því að báturinn var fullur af vatni og enduðum við með að þrífa allan bátinn og svo var komið of slæmt veður þegar að við ætluðum loksins að fara, pabbi skuldar okkur strákunum (Bjarki Flóvent og Björgvin Júlíus komu með mér) því eitt stk bátsferð. Ég þóttist vera voðalega heilsulegur, skellti mér í sund og synti heilan helling og eldaði svo einhverja heilusamlega máltíð, miðað við pizzuna og kjúklinginn sem ég er búinn að éta í kvöld þá hefur þetta heilsusamlega átak ekki endst vel. Ég fór svo á spænsku námskeið svona aðeins til að undirbúa mig fyrir för mína til Madrid. Var mjög hrifinn af þessar spænskukennslu og er jafnvel að hugsa um að skrá mig aftur á svona námskeið til að reyna að bæta aðeins við það sem ég lærði svo úti í Madrid. Eins og það væri ekki nógu spennandi að vera farinn að læra nýtt tungumál heldur þá var mér boðið að vera statisti í Fangavaktinni (sem ég hef by the way ekki ennþá séð), sótti um það fyrir löngu síðan svona uppá djókið en svo var bara haft samband við mig uppúr þurru og kallinn kallaður í tökur. Sést meira að segja glitta í mig nokkrum sinnum í þessu eina atriði sem ég var í. Ég og Inga Marí lékum okkur víst í skemmtilegum leik sem hét „Réttu mér hárburstann" förum ekkert nánar útí það. Dagný systir átti afmæli og hélt svaka veislu. Ég bloggaði svo um veisluna. Inga María var voðalega dugleg að subba út (vá ég er bara rétt svo að verða hálfnaður með mánuðinn, veit ekki hvort ég haldi þetta út) Greinilegt að ég var ekki bara við það að gefast upp á þesu bloggi því að þann 15. Júní þá var það sem ég bloggaði um bara það að við hefðum ekkert að gera og hver sem er mætti koma með einhverjar hugmyndir, merkilegt blogg það. Ég bauð Helgu í smá surprise ferð útaf próflokunum hjá henni og var það nú meira tilstandið að koma því öllu heim og saman. 17. Júní, það er víst árlegur viðburður að foreldrar spila á fótbolta á móti börnunum sínum og eru foreldarnir víst oft klædd í allskonar skringilegan klæðnað, eða svo hélt ég. Mætti út á völl klæddur eins og bavíani og sá þá að allir aðrir voru bara í venjulegum fötum jafnvel bara íþróttagöllum. Eins gott að ég var kæddur eins og bavíani(reyndar ekki raunverulegur bavíani, tek bara svona til orða) því að mér leið svo sannarlega eins og algjörum bavíana. Daginn eftir mættust svo Valur og Álftanes í Bikarkeppni KSÍ og grísaði Valur á 2-0 sigur þar sem að þeir skoruðu sigurmörkin á síðustu mínútunum. Bjarki Flóvent fór svo í keppnisferð uppá Skaga og mamma og systir hennar Helgu útskrifuðust, nei ekki af kleppi heldur úr háskólanum. Slegið var upp dýrindisveislu sem var hin mesta skemmtun. Ég uppgötvaði það hversu vanmetinn svefn er, skiljanlegt enda maðurinn orðinn 3 barna faðir. Ég þurfti að skila vanskilabók á bókasafnið. Í þessum mánuði fékk ég þær sorgarfréttir að hann Tobbi, nágranni frá því á Sogaveginum hefði látist. Ég þekkti hann og fjölskylduna hans mjög vel þar sem að ég og Rakel dóttir hans vorum nú einu sinni jafnaldrar og saman í bekk upp allan grunnskólann. Var ekki í miklu sambandi við þau hin síðari ár en man alltaf eftir að hafa óskað þeim gleðilegs nýs árs þegar ég var heima hjá mömmu og pabba um áramótin. Ég man að mér fannst það voðalega skrítið að sjá hann ekki með glas í hönd núna um síðustu áramót. Ég verð að viðurkenna að mér finnst allt það sem gerðist eftir þetta í mánuðinum vera svo ómerkilegt að ég finn mig á engan hátt knúinn til að blogga aftur um það.

Hérna er kominn fyrri helmingurinn af annálnum, ég ætla að bíða með þann seinni í smástund þar sem að klukkan er farin að ganga 3 um nótt og ég er búinn að vera alveg óratíma að skrifa um þessa fyrstu 6 mánuði ársins og á ekki von á að ég verði eitthvað fljótari að skrifa um þá næstu 6. Því ætla ég að láta þetta duga í bili og hendi svo seinni helmingnum inn við fyrsta tækifæri.

Þetta er Daníel T. Daníelsson sem skrifar frá Áltanesi